Ууру болуптур бир. Бир күнү ал кедейдин үйүнө кирет. Кожоюн кармап алат. Суракка алат ууруну:
– Не издеп келдиң?
Уурунун жооп узатып турганы:
– Байлык издеп жүрмүн.
Муну уккан кожоюндун күйбөгөнү күл болот:
– Ой атаңдын оозун урайын десе, кандай уяты жок немесиң! Мен күндүзү издеп таппаган байлыкты сен түнүчүндө табат бекенсиң?!
Кургабаган сүлгү
Үйлөнүү үлпөтүнөн көп өтпөй төркүнүнө жөнөгөн келинден өз энеси сурап калды:
– Кандай анан, кайненең менен болгон мамилеңер көңүлдөгүдөйбү?
– Баары жайында, бир гана мага жакпаганы: алардын үйүндө сүлгү кургабайт экен.
– Кызым, сен үйдө алардан кеч ойгонуп турган үчүн ошондой да. Бетиңди кургак сүлгүгө сүртүнүш үчүн, сен демек башкалардан мурда озунуп, төшөгүңдөн таң заарында турушуң керек, – дептир апасы.
Чындыкты айтуу
Өлүм алдында жаткан күйөөсү зайыбын чакырып сураптыр:
– Кемпир, өлөрүмдү көрүп турасың, чыныңды айтчы: өмүрүңдө көзүмө чөп салдың бекен?
– Болуптур, айтайын. А кокус тирүү калсаңчы, анда өзүмдү өлтүрүп тынып жүрбө? – деген экен.
