Жолдо аял менен эркек келатса шайтан жолугуп калат.
— Салам, адам баласы. Катыныңды ээрчитип каякка? – деп салам айтып алик албай эле сурап турат шайтан акең.
Анын бул жосуну адамдын кыжырын келтирет, анткени жанындагы аялга анын бул орой сөзү катуу тийген эле.
— Арам шайтан! Эмне деп былжырап турасың? Бул мага эч кандай аял эмес!
— Анда бул аял сага ким анда?
— Тууганым болот.
— Кандайча тууган, түшүндүрчү? Тууган деген ким болот билбейт экенмин.
— Андай болсо угуп тур, шаңыраңдаган шайтаным. Мунун апасы менин аялымдын кайненеси. Эми анын мага кандай тууган экенин өзүң билип ал!..
Бирок шайтандын буга таптакыр башы жетпейт. Ошентип башы жетпегенде манжаларын санап кирет, алар жетпей калганда бутунукун санайт, алар да жетпейт. Жаңылып калдымбы деп бул мүчөлөрүн кайра-кайра санап абдан кыйналганда кетип калган адамдын артынан кууп жетип кайра сурайт:
— Таптакыр түшүнө албай койдум, адам аке, айтып койчу, экөөңөр кандай туугансыңар?
— Өзүң билип ал! Ошон үчүн шайтансың да, — деп адам өз жолу менен кете берет.
Ошондон бери шайтан башын оорута ойлонуп, бул дүйнөдө эбак жок ошол аял менен ал эркек кандай тууган экенин биле албай келатат дейт.
Жакты