Лира Райымбекова — Түш көрүүдөн тажадым

Билсем дагы ашык болуп сүйгөнүм,
Билбегендей салкын карап жүргөмүн.
Чабалекей чарк айланып учкандай,
Чынында эле мен да аны сүйгөмүн.
Ашыктык жол ачылбасын билгемин,
Азыр мына сенден алыс күндөмүн.
Ортобуздан өтүп кетти бир топ жыл,
Ошондо да оюмдасың, билбедим.
Көргөн түштө жакын басып келесиң,
Кучак жайып жакын басып элесиң.
Жабыр чегип түш көрүүдөн тажадым,
Жалын күчүн сага гана бергенмин.
Кетсе дагы алыс болуп карааның,
Кээде ойлоп оттой күйүп- жанамын.
Ушул менин азыр сага айтарым,
Улам өйдө өсө берсин таалайың.