Ой комузчу, комузчу,
Чертип койчу, комузду.
Элжиресин эт жүрөк,
Бийик чыгар добушту.
Муратаалы чал тарткан,
«Сынган Бугу», «Камбаркан»,
Ушул сонун күүлөрдү
Уккан жандар таң калган.
Ойго келбейт убайым,
Оюнуңа тунайын
Токтогулдун «Ботоюн »
Чертип койчу угайын.
Жерде эмес бийик көктөсүң,
Жаныңан кыздар кетпесин.
Козгоп-түзөп койдуң бейм,
Жүрөгүмдүн тепкесин.
Ниязаалы сайраткан,
Боз жоргодой айдаткан.
«Сары Барпы » күүнү черт
Тыңшасын булбул чарбактан.
Ак куу канат каккандай,
Дарыя жылып аккандай.
Элестетем бир туруп
Жаштар бирге баскандай
