Ырдаймын ышкым бар үчүн,
Ынтызар болдум жар үчүн.
Айтамын арман бар үчүн,
Азапка түштүм жар үчүн.
Ак ороону колго алган,
Ак жибектей нурданган.
Алганым сендей болбосо,
Аңтарылсын шум жалган.
Адамдан артык порумуң
Азапка салат жоругуң.
Акырет кетсем унутпайм,
Ак алма жытуу мойнуң.
Чач мончогуң шурудан,
Таппадым издеп уруудан.
Кыргызда сендей жок экен,
Чыкпаса эле тигил буруудан.
Алкымың аппак жылдыздан,
Акылың артык топ кыздан.
Бул дүнүйө жалганга,
Адашып келбе нур кыздан.
Жыпырдай жытың буркурап,
Жибектей чачың нуркурат.
Денеден сендей чыкпаса,
Пендеден сулуу ким чыгат?.
Агарып атчу таң барбы?
Алтыным сендей жан барбы?
Акактай аппак мойнуңдан,
Аймалап жатчу түн барбы?
Тоодон бир атчу таң барбы,
Күмүшүм сендей гүл барбы.
Күмүшүм менин эркем деп,
Тогошуп жатчу түн барбы.
Кыргызча mp3 каталогу: Ала-Тоо таңшыйт, жомоктор жана башка кызыктуу аудиолор жана текстер жыйнагы.
