Азиз Батыров — Чыңгыз Айтматовго

Эскерип ырдайм эмгегин
Чынгыздай улуу атанын
Калеми менен жарыткан
Адабий рухун ааламдын
Кара сз болсо бийик тоо
Айтматов анын аскасы
Өнөрү менен көкөлөп
Жетпеген андан башкасы

Таластын суусу шаркырап
Жылдыздар көктөм жаркырап
Махабат ыры жаңырса
Элесиң эске тартылат

Жашоонун кырчын кырында
Адамзат канча жаңылбас
Чагылтып аны кылымга
Калеми жазды багынбас

Жазаарда курчуп сыясы
Түгөнбөй кайра көгөргөн
Шаңшыган бүркүт сыягы
Өнөрдүн туусун көтөргөн

Ааламга журтун таанытып
Дүйнөсүн элдин байытып
Өзүңдөн узак жашасын
Чыгармаң кылым карытып

Дүйнөнүн көркөм көлүнө
Чыгармаң бүтүн чайынган
Из калып эч бир өчпөгөн
Ааламга жолун салынган

Кайгылуу кабар укканда
Дуйнөмө түшкөн дүрбөлөң
Жеткениң бейиш жер болсун
Кеткениң арман дүйнөдөн

Көл деле сени сагынат
Ак-кеме сүзгөн баягы
Көңүлдөң өчпөй жаңырат
Сен жазган сүйүү баяны

Жаралса кайра жаралаар
Чыңгызга теңдеш зор адам
Кыргызга түшкөн кутка окшоп
Миң жылдар өтсө арадан
Жүрөктөн өчпөйт Чыңгызым