Бир карасаң бир дүйнө, бир карасаң түр дүйнө.
Ыр түбүнө жетпеген, баарыбызга бир дүйнө
Багы жокко кур дүйнө, базарчыга пул дүйнө
Сабаты жок калганың, самсаалаган кул дүйнө
Кийизчиге кыл дүйнө, кыз-жигитке сыр дүйнө
Алыкулду пир туткан, акындарга ыр дүйнө
Ич күйдүгө туз дүйнө, үйү жокко сыз дүйнө
Күн-түн көчө таптаган, бойдокторго кыз дүйнө
Молдокеге дин дүйнө, жеңилдерге чын дүйнө
Көр оокатка көмүлгөн, баарыбирге түн дүйнө
Көпөстөргө той дүйнө, малы жокко кой дүйнө
Бийиктикти эңсеген, кыскаларга бой дүйнө
Карыларга жаш дүйнө, сулууларга каш дүйнө
Кессе каны чыкпаган, битирлерге таш дүйнө
Дудуктарга сөз дүйнө, азиздерге көз дүйнө
Эл кадырын унуткан, өзүмчүлгө өз дүйнө
Мергенчиге өр дүйнө, бийликчиге төр дүйнө
Куран сообу окулган, маркумдарга көр дүйнө
Соодагерге кел дүйнө, кетменчиге бел дүйнө
Намыс үчүн бек турган, эр жигитке эл дүйнө
Баласызга зар дүйнө, ак көңүлгө бар дүйнө
Күйүп-күлүп сүйлөгөн, көрө албаска тар дүйнө
Сыйлабаска сен дүйнө, көпкөндөргө мен дүйнө
Кыргыз элин тааныткан, Чынгыз эрге кең дүйнө
Жаш балага кант дүйнө, досчулукка ант дүйнө
Сүйүп-күтүп жүргөнгө, жазындагы март дүйнө
Аксакалга ак дүйнө, аялдарга бак дүйнө
Адам баркын түшүнгөн, акылманга жат дүйнө
Ушшакчыга тил дүйнө, окуучуга бил дүйнө
Кусур жутуп албаган, шылуундарга ил дүйнө
Кемпирлерге сүт дүйнө, өрмөчүгө күт дүйнө
Күн-түн дебей иштеген, милицияга түт дүйнө
Илимдүүгө ой дүйнө, касапчыга сой дүйнө
Күндө эртең кел деген, кызматчыга жой дүйнө
Оройлукка суз дүйнө, сүрөтчүгө түс дүйнө
Жөжө санаар кез келет, саясатка күз дүйнө
Чабактарга көл дүйнө, чабандарга төл дүйнө
Эрте башын жазбаган, алкаштарга ал дүйнө
Куудулдарга тың дүйнө, ит кыялга үр дүйнө
Ала жипти аттаган, келиндерге жүр дүйнө
Жөө күлүккө тер дүйнө, жесирлерге эр дүйнө
Кечке сыздап отурган, кайырчыга бер дүйнө
Сүйүшкөнгө гүл дүйнө, багбанчыга түр дүйнө
Өз оюна ээ эмес, коркокторго сүр дүйнө
Уйкучуга түш дүйнө, студентке түш дүйнө
Бар атасын тааныбас, зөөкүрлөргө күч дүйнө
Дыйкандарга суу дүйнө, алдамчыга пул дүйнө
Колго курал кармаган, жоокерлерге туу дүйнө
Дүкөнчүгө сат дүйнө, бекерчиге сак дүйнө
Кырса эми кургабас, шайлообекке сак дүйнө
Усталарга так дүйнө, сагынганга кат дүйнө
Ыры менен бийлеген, Айчүрөккө шат дүйнө,
Кош бойлууга ай дүйнө, шоопурларга май дүйнө
Ак куу сүзүп ойногон, Ысык-Көлгө жай дүйнө
Уурулукка түн дүйнө, ырчыларга үн дүйнө
Салтты бийик сактаган, кыргыздарга күн дүйнө
Намыс, уят, ар болсун, жок дебейли бар болсун
Жаныбызда биз сүйгөн, бизди сүйгөн жар болсун
Тынчы жок жер жер эмес, ырчы жок эл эл эмес
Ыйман толсун пейилге, ырлар болсун кем эмес
Бек Борбиев — Базарчыга пул дүйнө тексти
Датасы: 26.11.2020 Көрүүлөр: 372
Саламатсыңарбы kyrgyz audiocom сураныч ушул ырдын акардеон версиясын жүктөп койгулачы