Өнөр өзү эмине,
Өзгөчөлүк деминде.
Өркүндөсө бериле,
Оргуштатып чыгарат,
От алышып демине.
Табияттан келгени,
Тартуу кылып бергени,
Таамай ырдап турганы.
Тарбиясы чоң тура,
Таалим сөзгө бурганы.
Аа,аа,аа.
Талант деген эмине?
Талыкпастан элине,
Тартууласа саптарды,
Таптатып келген жерине.
Термелишип чыгышат,
Дем кошушуп демине.
Дегеле жалган бир сөз жок,
Деминен чыккан кебинде.
Дөңгөлөктөй айланып,
Далай күчтөр жанданып.
Ээ,ээ,ээ.
Көөдөндөргө ыр толот,
Кайрыктары камдалып.
Көздөрүнө нур толот,
Көңүлдөргө сыр болот.
Кезектешип чамданып,
Акындарга айла жок.
Ак таңдайга таң калып,
Кунт коюшуп угушат.
Төгүп жаткан саптарын,
Элестетип турушат.
Аа, аа,аа.
Элден чыгат өнөрлөр,
Элден чыгат дөлөңдөр.
Эркин ырдап үн кошсо,
Эргип созот чеберлер.
Булбул сыңар сайраса,
Буктар чыгат берендер.
Жанданышып үндөрү,
Жарык ачык түрдөгү.
Жетип тамыр аралап,
Жүрөк толкуп жүргөнү.
Ээ, ээ,ээ.
Комузчуну жалгаса,
Комуз колго кармаса.
Кылды чертип тайбаса,
Комузунан ыр чыгат.
Кадимкидей муң чыгат,
Үн чыгарса бук чыгат.
Чыгарбаса тумчугат,
Чертип келип боздотсоң.
Ыргытманы ойнотсо,
Кереметтүү күү чыгат.
Аа, аа, аа.
Дастанчылар сайраса,
Дастан айтып кайнаса.
Дүбүрттөрү жанданса,
Далай доорду талдаса.
Эби келет ал жердин,
Ооздон-оозго калтырып.
Көз алдыңа тартылып,
Кайгысы менен жыргалдын.
Кайрыктары камтылып,
Добушу келет ал кездин.
Ээ,ээ,ээ.
«Манас» айтып баштасаң,
«Манасынан» таштаса.
Манасчыга теңирим,
Берген экен башкача.
Манастын казынасын,
Ушул күнгө муңдурбай.
Улуу сөздү буздурбай,
Манасчылар сактады.
Манас ата калтырган,
Мурастарын актады.
Аа,аа,аа.
Муундан-муунга өткөрүп,
Каада-салты такталды.
Ошол кезден ушуга,
Осуяты сакталды.
Орошондоп күн өттү,
Ондоп, жүздөп жыл өттү.
Өнөрлөрдү өлтүрбөй,
Өнөрпоздор өрчүттү.
Муундан-муунга айттырып,
Мурас кылып калтырып.
Ээ,ээ,ээ.
Мүнүшкөрлүк сакталды,
Мүйүз уста чебери.
Мурап болуп такталды,
Мындан башка чеберлер.
Саймачылар, зергерлер,
Санжырачы, саяпкер.
Сыяпаттап, урматтап,
Сый көрсөткөн кубаттап.
Кол өнөрчү өнөрүн,
Коргоп келдик кынаптап.
Аа,аа,аа.
Ата-баба мурасын,
Алпештейли, актайлы.
Өнөрлөрдү калтырды,
Өчпөс кылып чаптайлы.
Өркүндөтүп өспүрүм,
Өспүрүмдү таптайлы.
Өнөрүңдү өргө чап,
Өнөрлүүнү барктайлы.
Өмүр өтөт, доор өтөт,
Ɵнөр өлбөйт, сактайлы.
Ээ,ээ,ээ,
Аа,аа,аа.
Эльзар Өскөнбаева — Ɵнөр өлбөйт, сактайлы тексти
Датасы: 24.10.2020 Көрүүлөр: 1474
