Улуттай көчкөн бул заман
Бул заманда не жаман
Өздөн чыккан жат жаман
Өзөктү жеген дат жаман
Өкүмү күчтүү кас жаман
Өмүрдү жеген мас жаман
Арыктаган ат жаман
Айыкпаган дарт жаман
Берекесиз аз жаман
Көлөкөсүз бак жаман
Тилсиз келген жоо жаман
Түбү бүтпөс доо жаман
Эздебеген ээ жаман
Иштебеген мээ жаман
Пайдасы жок бар жаман
Айласы жок зар жаман
Кенен туруп тар жаман
Керсеңдеген хан жаман
Теңтуш болуп балдарга
Темтеңдеген чал жаман
Напсисине багынган
Намыс жаман ар жаман
Инсандарга жеткирбес
Илимдүү жүргөн жан жаман
Жетимге тонун кийгизбей
Жетиги толук бай жаман
Капчыгын кагаар бай жаман
Карыга тойбос сук жаман
Энесин чапкан ит жаман
Энесин саткан кыз жаман
Далыдан өткөн көз жаман
Дартыңды козгоор өз жаман
Кең дүйнөсү тарылып
Кечиримсиз өч жаман
Жүрөгүңдү куйкалап
Жүлүнгө жеткен сөз жаман
Уурусун кармап турсаң да
Уялбаган бет жаман
Убарага көндүрүп
Убадачыл бек жаман
Акылдуу боло калам деп
Айыпка калган кез жаман
Кылымдар бою унутпай
Кылычын сунаар кек жаман
Тузака түшкөн дил жаман
Ушакка бүткөн тил жаман
Айбандын жолун көргөзүп
Азгырык шайтан жин жаман
Алганды гана үйрөнүп
Алкымы бузук эр жаман
Үйдө баатыр жоодо жок
Үрсөңдөгөн шер жаман
Ыйманынан ажырап
Ынтымаксыз эл жаман
Ырсаңдап кудай сөзүнө
Ыймансыз өткөн эң жаман
Кара түндү жамынып
Капыстан тийген ок жаман
Алкымына жамынып
Адилетсиз сот жаман
Кыйынчылык кимде жок
Кысталышта жок жаман
Мунсуз дүйнө кызыксыз
Муунга салаар көк жаман
Санаалаш жүрүп баарынан
Сатып кеткен дос жаман
Жеңишбек Жумакадыр — Не жаман? тексти
Датасы: 06.10.2020 Көрүүлөр: 176
