Бакыт Мамаев — Аруу сезим

Күндө келем ал жерди караш үчүн,
Күтө берип күтүүдөн тажаш үчүн.
Атайлап кыйнаймын кара жанды,
Аруу сезим аз-аздан тараш үчүн.
Жазбаш үчүн сага арнап ырларымды,
Катам көңүл түбүнө сырларымды.
Сезимимден тезирээк чыгарсам дейм,
Сен мага арнаган жыргалыңды.
Келбесиңди билсем да саатты чектеп,
Келеби деп күнүгө эскини эстеп.
Жүрөгүмдөн сезимдер өчүш үчүн,
Жүргөн кезим өзүмдү өзүм жектеп.