Ал кезде менин жашоом көктөм эле
Ак жамгыр ошол күнү төккөн эле
Акылдуу сыймыктанган кыз болгуң деп
Атакем маңдайыман өпкөн эле
Жашоомдо өз ордумду билбей келем
Жаш толгон көздөрүмдү ирмей берем
Алыстан адамдардын арасына
Атаке караныңды издей берем
Сагыныч жүрөктү эзип ыйлай берем
Санаанын ченгелинен чыкпай келем
Ар дайым кийип жүргөн көйнөгүңдү
Атаке моокум канбай жыттай берем
Туура жол туура багыт берер элең
Турмуштан кыйналганда керек элең
Өмүрдө аска зоо бар кезимде
Өзүмдү эң бактылуу сезер элем
