Жабыгып улап жан дүйнө туюм
Удургуп булут, уюлгуйт куюн
Кабарлап жатат окшойбу деймин
Карайлап турган замандын кунун
Ызгаары күздүн өктөмдүк кылат
Кең дүйнө тарып кеткенсип турат
Үшүтүп койду, үшкүрүк чыгып
Үмүттүн оту өчкөнсүп турат
Күрөштүн куну жеңишти туймак
Көк түтүн бүркүп көмүскө туйлап
Чокулар тилип этеги далдал
Булуттар тоодон келишти ыйлап
Буулугуп асмап,эшилип карды
Чагылган тийип тешилип калды
Астын-үстүн болуп алаамат дүйнө
Ачылып калган эшиги барбы?
Бороону боздоп сапырып көлдү
Борошо кышты чакырып келди
Табият улуу күрөштү бүгүн
Карекке минтип батырып берди
Аязга деле кайыкса мейли
Ата Журт эрте айыкса дейли
Каруусун казык кылбаган өлкө
Жыгыла берет айыпка эми
“Кайрылып кайра Семетей келет
Айланып кеткен кайыпка”, — дейби?
Кыргызча mp3 каталогу: Ала-Тоо таңшыйт, жомоктор жана башка кызыктуу аудиолор жана текстер жыйнагы.
